പ്രിയ രാഹുല് ഗാന്ധി ജീ,
താങ്കള്ക്കും മാതാവിനും സഹോദരിക്കും മച്ചുനനും മരുമക്കള്ക്കും സുഖമാണെന്ന് വിശ്വസിക്കുകയും അങ്ങനെ തന്നെ ആയിരിക്കട്ടെ എന്നു സര്വ്വേശ്വരനോട് പ്രാര്ത്ഥിക്കുകയും ചെയ്യുന്നു.
ഇവിടെ കേരളത്തില് രാഷ്ട്രീയ മുതലെടുപ്പിനായി ചില പൊളി പ്രചാരണം നടന്നു വരുന്നു. യാതൊരു വിധത്തിലുമുള്ള ശാസ്ത്രീയ അടിസ്ഥാനവും ഇല്ലാതെ എന്ഡോ സള്ഫാന് എന്ന നിരുപദ്രവകാരിയായ കീടനാശിനി നിരോധിക്കണമെന്നാണ് ഇക്കൂട്ടരുടെ ആവശ്യം. ഞങ്ങള് കേരളീയരും, ഞങ്ങള് ഉള്പ്പെടുന്ന ഭാരതീയരും കൂടാതെ ലോകമെമ്പാടും ഉറ്റു നോക്കുന്ന ഇന്ത്യയുടെ ഒരേയൊരു രക്ഷ താങ്കളുടെ കുടുംബവും പാര്ട്ടിയും ആണെന്ന് ഞാന് പ്രത്യേകിച്ച് പറയേണ്ട കാര്യമില്ലല്ലോ. അങ്ങനെയുള്ള താങ്കളുടെ കുടുംബം നയിക്കുന്ന ഭാരത സര്ക്കാരിനെ ലോകത്തിനു മുമ്പില് കരി വാരി തേയ്ക്കുവാനുള്ള കുത്സിത ശ്രമമാണ് ഇങ്ങു കേരളത്തില് പെറ്റി കമ്മ്യൂണിസ്റ്റു പാര്ട്ടി നടത്തി വരുന്നതെന്ന് പ്രത്യേകിച്ച് പറയേണ്ടതില്ലല്ലോ. കൂടാതെ രാജ്യത്തിന്റെ അഭിമാനമായ പൊതുമേഖല സ്ഥാപനത്തിന്റെ ഉത്പന്നം - എന്ഡോ സള്ഫാന് ഇവിടെ 10 വര്ഷമായി നിരോധിച്ചിരിക്കുകയാണ്. ഇത് രാജ്യത്തിനോടുള്ള വെല്ലുവിളിയായി കണക്കാക്കേണ്ടതാണ്.
ഇത്തരം സാഹചര്യത്തില്, നേരത്തെ സൂചിപ്പിച്ചതുപോലെ, ലോകം മുഴുവന് ഉറ്റു നോക്കുന്ന, ഈ നൂറ്റാണ്ടിന്റെ മധ്യത്തില് ലോകത്തിലെ ഒന്നാമത്തെ രാജ്യമായ നമ്മുടെ നാടിനെ അക്കാലയളവില് നയിക്കേണ്ട താങ്കളും അപ്പോള് താങ്കള്ക്ക് തങ്ങും തണലുമായി നില്ക്കേണ്ട താങ്കളുടെ കുടുംബവും ഈ നീച പ്രവര്ത്തിക്കെതിരെ അടിയന്തിരമായി ഇടപെടെണ്ടാതാണ്. താങ്കളും കുടുംബവും ഒഴികെ മറ്റാര് തന്നെ പറഞ്ഞാലും ഇവിടുത്തെ രാഷ്ട്രീയക്കാര് അങ്ങീകരിക്കില്ല എന്നു അങ്ങേക്കറിയാമല്ലോ. ആയതിനാല്, ഈ രാഷ്ട്രീയ കളിക്ക് എത്രയും പെട്ടെന്ന് അറുതി വരുത്തുവാന് താങ്കള് സത്വരമായി ഇടപെടണം. ഇതില് ചില അതി നൂതന മാര്ഗങ്ങള് താങ്കളുടെ പരിഗണനക്കായി മുന്നോട്ട് വയ്ക്കുന്നു. ഇവ ഇവിടുത്തെ രാഷ്ട്രീയക്കാരുടെ വായടപ്പിക്കാന് മാത്രമല്ല, ലോകത്തിനുമുന്നില് ഒരു ഉത്തമ മാതൃകയാകാനും താങ്കളെ സഹായിക്കും.
വിദ്യ 1 - എന്ഡോ സള്ഫാന് എന്ന കീടനാശിനി നിരുപദ്രവമാനെന്നു അങ്ങ് പൊതുജന സമക്ഷം തെളിയിക്കണം. അതിനു വലിയ പാടൊന്നുമില്ല. കശുവണ്ടി, കൊക്കോ, കാപ്പി തുടങ്ങിയ തോട്ടവിളകളില് ആണ് എന്ഡോ സള്ഫാന് ഉപയോഗിക്കുന്നത്. പൊതു പരിപാടികളില് ഈ തോട്ടവിള ഉത്പന്നങ്ങള് അങ്ങ് ഉപയോഗിക്കുകയും അവ ഉപയോഗിക്കുന്നത് പ്രേരിപ്പിക്കുകയും വേണം. തത്സമയം, ഇവ എന്ഡോ സള്ഫാന് ഉയോഗിചിട്ടുള്ളതാണെന്ന് പ്രകീര്ത്തിക്കുകയും വേണം. തികച്ചും നിരുപദ്രവകരമായ കീട നാശിനി ആയതിനാല് ഇവ കൊണ്ട് മാരകമായ അസുഖങ്ങള് ഉണ്ടാകുമെന്ന പ്രചാരണം ഇതോടു കൂടി ശക്തി കുറയും. ഈ തോട്ടവിളകളും അവ ഉപയോഗിച്ചുള്ള മറ്റു ഉത്പന്നങ്ങളും (ബിസ്കറ്റ്, ചോകലെറ്റ്, കോഫീ തുടങ്ങിയവ) പരമാവധി ഉപയോഗിക്കാനും പ്രചരിപ്പിക്കാനും പാര്ട്ടി പ്രവര്ത്തകരെയും ലോക ജനതയെയും താങ്കളും കുടുംബവും ഉത്ബോധിപ്പിക്കണം.
വിദ്യ 2 - താങ്കളുടെയോ കുടുംബങ്ങങ്ങളുടെയോ അടുത്ത സ്വകാര്യമോ പോതുകര്യമോ ആയ കേരള സന്ദര്ശനത്തില് കുടിവെള്ളം മുതല് കുളിവെള്ളം വരെ എന്ഡോ സള്ഫാന് മേഘലയില് നിന്നുള്ളവ ആകണം എന്നു നിഷ്കര്ഷിക്കണം. കൂടാതെ അവിടെ ഒരു കുടിവെള്ള പ്ലാന്റ് നിര്മ്മിച്ച് AICC / PCC അങ്ങള്ക്കുള്ള ആയുഷ്കാല കുടി-കുളി വെള്ളം ആ പ്ലാന്റില് നിന്നുള്ളവ ആയിരിക്കണം എന്നും നിഷ്കര്ഷിക്കണം. വേണമെങ്കില്, ആവശ്യമായ നിയമ നിര്മ്മാണം ഇതിലേക്കായി നടത്തണം. ഇങ്ങനെ പ്രവര്ത്തിച്ചാല്, കള്ളാ പ്രചാരകരുടെ ശക്തി കുറയുക മാത്രമല്ല, അവര് അപ്പാടെ നിലംപരിശാകുകയും ചെയ്യും. പ്രവര്ത്തിയിലൂടെ ഇവര്ക്ക് ചുട്ട്ട മറുപടി നല്കാനും ലോകത്തിനു പുതിയ ഒരു സന്ദേശം നല്കുവാനും ഇതിലൂടെ താങ്കള്ക്ക് കഴിയും.
ടി പ്രവര്തികളിലൂടെ താങ്കള് ഉടന് മാതൃക കാട്ടിയില്ലെങ്കില്, ഈ കത്തിലെ സാരാംശം ദുഷ്ടരും നീചരും ക്രൂരരുമായ എതിര് കക്ഷികള് നിന്ദ്യവും ക്രൂരവും പൈശാചികവുമായി താങ്കള്ക്കെതിരെ ഉപയോഗിക്കുമെന്ന് താങ്കളോട് പ്രത്യേകിച്ച് പറയേണ്ട കാര്യമില്ലല്ലോ. താങ്കള്ക്കെതിരെ എന്നു പറയുന്നത് താങ്കളുടെ കുടുംബത്തിനു എതിരെ എന്നും, പാര്ട്ടിക്ക് എതിരെ എന്നും ആത്യന്തികമായി ഈ മഹാ രാജ്യത്തിന്റെ സുന്ദര ഭാവിക്കെതിരെ ആയിരിക്കുമെന്നും എല്ലാവര്ക്കും അറിയാവുന്ന കാര്യമാണെന്നും താങ്കള് ബോധാവനായിരിക്കുമല്ലോ.
താങ്കളെ സ്നേഹിക്കുകയും ബഹുമാനിക്കുകയും രക്ഷകനായി കാണുകയും ചെയ്യുന്ന, പാര്ടി പ്രവര്ത്തകന് അല്ലാത്ത (എന്ഡോ സല്ഫാനേ പേടിച്ചിട്ടൊന്നുമല്ല, അമ്മച്ചിയാണേ ഞാന് പാര്ട്ടി പ്രവര്ത്തകന് ആകാത്തത്, സത്യം) താങ്കളുടെ ഒരു വിനീത വിശ്വസ്തന്,
ഗുരുദാസ് എസ്.
തിരുവനന്തപുരം.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ